IPLની દરેક સીઝનની રાહ ક્રિકેટ પ્રેમીઓ આતુરતાથી જોતા હોય છે, અને તેનું એક મુખ્ય કારણ છે એમ.એસ ધોની. આ વખતે પણ ધોની ચેન્નાઈ સુપર કિંગ્સની જર્સીમાં મેદાન પર ઉતરવા માટે તૈયાર છે. આ સિઝનની પહેલી મેચ તે મુંબઈ ઈન્ડિયન્સ સામે એમ.એ ચિદમ્બરમ સ્ટેડિયમમાં રમવાનો છે. પરંતુ આ મેચ પહેલાં જ ધોનીએ પોતાની નિવૃત્તિ અંગે એક મોટું નિવેદન આપીને ચાહકોનું ધ્યાન ખેંચ્યું છે.
ધોનીની 18મી IPL સિઝન
એમ.એસ ધોનીએ 2020માં આંતરરાષ્ટ્રીય ક્રિકેટને અલવિદા કહી દીધું હતું, પરંતુ IPLમાં તેનો જાદુ હજુ પણ ચાલુ છે. આ વખતે તે 18મી સિઝન રમવા માટે મેદાને ઉતરશે. આજે, 23 માર્ચે, ચેન્નાઈ સુપર કિંગ્સ અને મુંબઈ ઈન્ડિયન્સ વચ્ચે રોમાંચક ટક્કર જોવા મળશે. આ સિઝન શરૂ થતાં પહેલાં ધોનીએ પોતાની ભાવિ યોજનાઓ અંગે વાત કરી, જે ચાહકો માટે રાહતના સમાચાર લઈને આવી છે.
નિવૃત્તિ પર શું બોલ્યો ધોની?
છેલ્લાં કેટલાંક વર્ષોથી દરેક IPL સિઝનમાં એવી ચર્ચા થતી રહે છે કે શું આ ધોનીની છેલ્લી સિઝન હશે? ગત વર્ષે પણ આવી અટકળો ચાલી હતી, પરંતુ ધોનીએ સિઝનના અંતે એ બધી વાતોને ખોટી સાબિત કરી દીધી હતી. 43 વર્ષની ઉંમરે પણ ધોની આ સિઝનનો સૌથી વયોવૃદ્ધ ખેલાડી છે, છતાં તેની ફિટનેસ અને રમતથી ચાહકોને આશ્ચર્ય થાય છે. આ વખતે સિઝનની શરૂઆતમાં જ ધોનીએ પોતાનું મૌન તોડ્યું અને નિવૃત્તિ અંગે સ્પષ્ટતા કરી.
જિયો હોટસ્ટારને આપેલા ઈન્ટરવ્યૂમાં ધોનીએ કહ્યું, “હું જ્યાં સુધી ઈચ્છું ત્યાં સુધી ચેન્નાઈ સુપર કિંગ્સ માટે રમી શકું છું. આ મારી પોતાની ફ્રેન્ચાઈઝી છે. ભલે હું વ્હીલચેર પર હોઉં, તો પણ CSK મને મેદાન પર લઈ જશે.” ધોનીના આ નિવેદનથી એવું લાગે છે કે તે હજુ ઘણા વર્ષો સુધી IPLમાં ચમકતો રહેશે.
ગાયકવાડે પણ ધોનીની પ્રશંસા કરી
ચેન્નાઈ સુપર કિંગ્સના કેપ્ટન રુતુરાજ ગાયકવાડે પણ ધોની વિશે મોટી વાત કહી છે. તેમણે જણાવ્યું કે ધોની પાસે હજુ ઘણું ક્રિકેટ બાકી છે. સચિન તેંડુલકરનું ઉદાહરણ આપતાં ગાયકવાડે કહ્યું, “સચિન તેંડુલકર 50 વર્ષે પણ શાનદાર બેટિંગ કરી રહ્યા છે. તેથી મને લાગે છે કે ધોની પણ લાંબા સમય સુધી રમી શકે છે.” ઉલ્લેખનીય છે કે સચિન હાલમાં જ ઈન્ટરનેશનલ માસ્ટર્સ લીગમાં રમ્યો હતો અને તેણે ત્યાં પણ પોતાની ક્ષમતા સાબિત કરી હતી.
ચાહકો માટે ખુશીની વાત
ધોનીના આ નિવેદનથી ચાહકોમાં ખુશીની લહેર છવાઈ ગઈ છે. તેની રમત અને લીડરશિપના દિવાના લાખો લોકો આ સિઝનમાં પણ તેને મેદાન પર જોવા માટે ઉત્સુક છે. શું ધોની આ વખતે CSKને ફરી એકવાર ટાઈટલ અપાવશે? આ જવાબ તો સમય જ આપશે.
