બાંગ્લાદેશમાં હિંસક વિરોધ પ્રદર્શન બાદ, શેખ હસીનાએ વડાપ્રધાન પદેથી રાજીનામું આપી દેશ છોડ્યું. આ પછી, સેના દ્વારા અંતરિમ સરકારના ગઠનની જાહેરાત કરવામાં આવી હતી. હવે, કાર્યકાળસરની સરકારના પ્રમુખ તરીકે મોહમ્મદ યુનુસે શપથ ગ્રહણ કરી છે. અંતરિમ સરકારની મુખ્ય જવાબદારી દેશમાં ફરીથી ચૂંટણી યોજવાની છે.
વડાપ્રધાન નરેન્દ્ર મોદીએ ગુરુવારે બાંગ્લાદેશમાં અંતરિમ સરકારના પ્રમુખ તરીકે શપથ ગ્રહણ કરનારા મોહમ્મદ યુનુસને શુભેચ્છાઓ પાઠવી. સાથે જ તેમણે આશા વ્યક્ત કરી કે બાંગ્લાદેશમાં જલ્દીથી પરિસ્થિતિ સામાન્ય થઈ જશે અને હિંદુઓ સહિત અન્ય લઘુમતી સમુદાયોની સુરક્ષા સુનિશ્ચિત થશે.
વાસ્તવમાં, PM મોદીએ સોશિયલ મીડિયા પ્લેટફોર્મ X પર એક પોસ્ટમાં લખ્યું કે, પ્રોફેસર મોહમ્મદ યુનુસને તેમની નવી જવાબદારીઓ સંભાળવા માટે મારી શુભેચ્છાઓ.
PM મોદીએ જણાવ્યું કે, “અમે હિંદુઓ અને અન્ય તમામ લઘુમતી સમુદાયોની સુરક્ષા સુનિશ્ચિત કરીને સામાન્ય પરિસ્થિતિની ઝડપથી પુન:પ્રાપ્તિની આશા રાખીએ છીએ. ભારત, શાંતિ, સુરક્ષા અને વિકાસ માટે બાંગ્લાદેશ સાથે મળીને કામ કરવા માટે પ્રતિબદ્ધ છે.”
નોંધનીય છે કે, નોબેલ પુરસ્કાર વિજેતા યુનુસ (84) એ બાંગ્લાદેશમાં અંતરિમ સરકારના પ્રમુખ તરીકે શપથ લીધી છે. રાષ્ટ્રપતિ મોહમ્મદ શહાબુદ્દીનએ રાષ્ટ્રપતિ ભવન ‘બંગભવન’ ખાતે યોજાયેલા સમારોહમાં યુનુસને પદની શપથ લેવડાવી.
બાંગ્લાદેશમાં નોકરીઓમાં વિવાદાસ્પદ અનામત પ્રણાલી સામે સરકાર વિરુદ્ધ હિંસક વિરોધ પ્રદર્શનના પરિણામે વડાપ્રધાન શેખ હસીનાએ પદેથી રાજીનામું આપીને ભારત આવ્યા પછી, મંગળવારે યુનુસને અંતરિમ સરકારના પ્રમુખ તરીકે નિમવામાં આવ્યા હતા.
