બજેટ 2025: હેલ્થ સેક્ટરને મળ્યા મોટા ફાયદા, કેન્સરની દવાઓ સસ્તી, 10 હજાર મેડિકલ સીટો વધશે...જાણો મુખ્ય જાહેરાતો

હેલ્થ સેક્ટર બજેટ 2025: આ વર્ષના બજેટમાં હેલ્થકેર સેક્ટરને ખૂબ મોટી રાહત અને સુવિધાઓ મળી છે. સરકારે આ સેક્ટરમાં ખર્ચ વધારવાની જાહેરાત કરી છે, જેમાં ટેક્સ રિફોર્મ્સ, મેડિકલ એજ્યુકેશન અને સારવાર સુવિધાઓ વધારવા પર ખાસ ધ્યાન આપવામાં આવ્યું છે. નાણામંત્રીએ હેલ્થકેર સેક્ટરને લઈને ઘણી મહત્વપૂર્ણ જાહેરાતો કરી છે, જેનો લોકોને ખૂબ ફાયદો થશે.

બજેટમાં હેલ્થકેર સેક્ટરને શું મળ્યું?

ડે કેર કેન્સર સેન્ટર્સની શરૂઆત

સરકારે જાહેરાત કરી છે કે આગામી 3 વર્ષોમાં દેશના તમામ જિલ્લાઓમાં ડે કેર કેન્સર સેન્ટર્સ શરૂ કરવામાં આવશે. ફાઈનાન્શિયલ યર 2025-26માં 200 આવા સેન્ટર્સ ખોલવાનો લક્ષ્યાંક રાખવામાં આવ્યો છે. આ યોજનાથી ગરીબ અને મધ્યમ વર્ગના લોકોને ખૂબ ફાયદો થશે, જેમને કેન્સરની મોંઘી સારવારનો ખર્ચ ઉઠાવવો મુશ્કેલ થાય છે.

કેન્સરની દવાઓ સસ્તી થશે

કેન્સરની 36 જીવનરક્ષક દવાઓને બેઝિક કસ્ટમ ડ્યૂટીથી મુક્ત કરવામાં આવશે. આ ઉપરાંત 37 અન્ય દવાઓ અને 13 નવા પેશન્ટ આસિસ્ટન્ટ પ્રોગ્રામ્સને પણ કસ્ટમ ડ્યૂટીથી છૂટ આપવામાં આવશે. જો કે, 6 જીવનરક્ષક દવાઓને 5% ની છૂટમર્યાદાવાળી યાદીમાં ઉમેરવામાં આવશે.

સરકારે જીએસટી દરોમાં કમી કરીને 3 એન્ટી-કેન્સર દવાઓ – ટ્રેસ્ટુજુમાબ (Trastuzumab), ઓસિમર્ટિનિબ (Osimertinib) અને ડુરવાલુમાબ (Durvalumab)ને કસ્ટમ ડ્યૂટીથી મુક્ત કરી છે.

લેન્સેટની એક સ્ટડી મુજબ, વર્ષ 2019માં ભારતમાં કેન્સરના લગભગ 12 લાખ નવા કેસ અને 9.3 લાખ મૃત્યુ નોંધાયા હતા. આંકડાઓ મુજબ, 2020માં આ આંકડો 13.9 લાખ, 2021માં 14.2 લાખ અને 2022માં 14.6 લાખ થઈ ગયો છે.

મેડિકલ કોલેજની સીટોમાં વધારો

મેડિકલ એજ્યુકેશન પર ધ્યાન કેન્દ્રિત કરતા સરકારે જાહેરાત કરી છે કે આ વર્ષે મેડિકલ કોલેજમાં 10 હજાર નવી સીટો ઉમેરવામાં આવશે. આ ઉપરાંત, આગામી 5 વર્ષોમાં 75,000 વધુ સીટો ઉમેરવાની યોજના છે. આનાથી મેડિકલ ક્ષેત્રમાં અભ્યાસ કરતા વિદ્યાર્થીઓને ખૂબ ફાયદો થશે.

હેલ્થકેર સેન્ટર્સમાં બ્રોડબેન્ડ કનેક્ટિવિટી

નાણામંત્રીએ જાહેરાત કરી છે કે તમામ સરકારી માધ્યમિક શાળાઓ અને પ્રાથમિક હેલ્થકેર સેન્ટર્સને બ્રોડબેન્ડ કનેક્ટિવિટી આપવામાં આવશે. આનાથી સારવાર અને શિક્ષણ ક્ષેત્રે ડિજિટલ સુવિધાઓ વધશે.

મેડિકલ ટૂરિઝમને પ્રોત્સાહન

છેલ્લા કેટલાક દાયકાઓમાં ભારતમાં મેડિકલ ટૂરિઝમનું પ્રમાણ ખૂબ વધ્યું છે. અન્ય દેશોની સરખામણીમાં ભારતમાં મેડિકલ સારવારનો ખર્ચ સસ્તો હોવાના કારણે વિદેશી લોકો અહીં સારવાર માટે આવે છે. આનાથી દેશની અર્થવ્યવસ્થાને ફાયદો થાય છે. સરકારે મેડિકલ ટૂરિઝમને વધુ પ્રોત્સાહન આપવાની યોજના જાહેર કરી છે.