સોનાની કિંમતોમાં ફરી એકવાર ઉછાળો જોવા મળ્યો છે, અને ભારત-પાકિસ્તાન વચ્ચે તણાવ વધવાના કારણે સોનું એક અઠવાડિયામાં જ 4,000 રૂપિયા પ્રતિ 10 ગ્રામ મોંઘુ થઈ ગયું છે. સરહદ પર તણાવની સીધી અસર સોનાના ભાવ પર દેખાઈ રહી છે. આ પહેલાં તેનો ભાવ સતત ઘટી રહ્યો હતો. માત્ર મલ્ટી કોમોડિટી એક્સચેન્જ (MCX) પર જ નહીં, પરંતુ સ્થાનિક બજારમાં પણ સોનાની કિંમતમાં વધારો જોવા મળ્યો છે. ચાલો જાણીએ છેલ્લા એક અઠવાડિયામાં 10 ગ્રામ 24 કેરેટ ગોલ્ડ રેટમાં કેટલો ફેરફાર થયો છે.
એમસીએક્સ પર સોનાના ભાવમાં ફેરફાર
સૌ પ્રથમ વાત કરીએ મલ્ટી કોમોડિટી એક્સચેન્જ એટલે કે MCX પર સોનાના ભાવમાં આવેલા બદલાવ વિશે. 2 મે (શુક્રવાર) ના રોજ 5 જૂનની એક્સપાયરીવાળા 999 શુદ્ધતાના સોનાની વાયદા કિંમત 92,637 રૂપિયા પ્રતિ 10 ગ્રામ હતી, પરંતુ ગત શુક્રવારે 9 મેના રોજ આ ગોલ્ડનો ભાવ (MCX Gold Rate) વધીને 96,535 રૂપિયા પ્રતિ 10 ગ્રામ પર પહોંચી ગયો. આ હિસાબે જોઈએ તો અઠવાડિયામાં સોનું 3,898 રૂપિયા પ્રતિ 10 ગ્રામ મોંઘુ થયું છે.
સ્થાનિક બજારમાં સોનાનો ભાવ
હવે વાત કરીએ સ્થાનિક બજારમાં સોનાના ભાવ (Gold Price) વિશે. ઇન્ડિયન બુલિયન જ્વેલર્સ એસોસિએશનની વેબસાઇટ (IBJA.Com) અનુસાર, અહીં પણ પહેલગામ આતંકી હુમલા બાદ ભારત દ્વારા પાકિસ્તાનને અપાયેલા જડબાતોડ જવાબ અને ત્યારબાદ સરહદ પર ભારત-પાકિસ્તાન તણાવની અસર જોવા મળી અને સોનાના ભાવમાં મોટો ઉછાળો આવ્યો છે. ગત 2 મેના રોજ સ્થાનિક બજારમાં 24 કેરેટ સોનાનો ભાવ 93,954 રૂપિયા પ્રતિ 10 ગ્રામ ચાલી રહ્યો હતો, જે ગત 9 મેના રોજ વધીને 96,420 રૂપિયા પ્રતિ 10 ગ્રામ પર પહોંચી ગયો. આ ગણતરી મુજબ, અઠવાડિયામાં અહીં પણ સોનું 2466 રૂપિયા પ્રતિ 10 ગ્રામ સુધી મોંઘુ થયું છે.
| ગુણવત્તા | સોનાનો ભાવ (પ્રતિ 10 ગ્રામ) |
|---|---|
| 24 કેરેટ ગોલ્ડ | ₹ 96,420 |
| 22 કેરેટ ગોલ્ડ | ₹ 94,100 |
| 20 કેરેટ ગોલ્ડ | ₹ 85,810 |
| 18 કેરેટ ગોલ્ડ | ₹ 78,100 |
| 14 કેરેટ ગોલ્ડ | ₹ 62,190 |
નોંધનીય છે કે ઇન્ડિયન બુલિયન જ્વેલર્સ એસોસિએશન (Indian Bullion Jewelers Association) દરરોજ સોના અને ચાંદીના ભાવની માહિતી આપે છે. અહીં તમને ટેક્સ અને મેકિંગ ચાર્જ વગરના સોના અને ચાંદીના ભાવ જણાવવામાં આવે છે. IBJA દ્વારા જે ભાવ જાહેર કરવામાં આવે છે તે દેશભર માટે સમાન હોય છે. જો તમે સોનું કે ચાંદી ખરીદો છો અથવા બનાવડાવો છો તો તમારે મેકિંગ ચાર્જ પર અલગથી જીએસટી અને મેકિંગ ચાર્જ ચૂકવવાના હોય છે.
સોનાની શુદ્ધતા આ રીતે તપાસો
જણાવી દઈએ કે દેશભરમાં સોનાના આભૂષણોની કિંમત એક્સાઇઝ ડ્યુટી, રાજ્યોના કર અને મેકિંગ ચાર્જના કારણે બદલાતી રહે છે. અહીં જણાવી દઈએ કે આભૂષણો બનાવવા માટે મોટાભાગે 22 કેરેટ સોનાનો ઉપયોગ થાય છે, જ્યારે કેટલાક લોકો 18 કેરેટ સોનાનો પણ ઉપયોગ કરે છે. આભૂષણ પર કેરેટ પ્રમાણે હોલમાર્ક નોંધાયેલ હોય છે. 24 કેરેટ સોનાના આભૂષણ પર 999 લખેલું હોય છે, જ્યારે 23 કેરેટ પર 958, 22 કેરેટ પર 916, 21 કેરેટ પર 875 અને 18 કેરેટ પર 750 લખેલું હોય છે.
